Рассом Туз фейсбукдаги постида депутат Алишер Қодировнинг Тошкентдаги рассом уйи ҳақида айтган гапларини кескин танқид қилди. У Ўзбекистон санъати тарихида турли миллат вакиллари бўлган рассомларнинг ўрнини эсга олиб, бундай ёндашувни «этномиллатчилик» деб атади. Қуйида пост матни имловий хатолари тўғриланган ҳолда берилади.

Тошкентдаги “ўрис художникнинг уйини бузворса ҳам бўлади, чунки у Шоҳи Зинданинг мингдан бирича эмас” — дунёдаги энг аҳмоқона гаплар коллекциясига киритса бўладиган бу гапни депутат Алишер Қодиров айтди.

Шунга ўхшаш аҳмоқона сабаб билан Тошкентдаги **”Дом кино”**ни Ортиқхўжаев бузиб ташлаганди. “Кўкалдош маданий обида, Дом кино эса обида эмас”, деганди олти класс саводи йўқ Ортиқхўжаев. Аммо Алишер Қодировдан бундай аҳмоқона гапни кутмагандим.

Ўзбекистонда ижод қилган барча рассомлар ўзбек ва бўлибам энг муҳтарам ўзбек. Қозонда туғилган Павел Бенков чизган Бухоро, Самарқанд ва Хивадаги деярли репортаждек асарларнинг қийматини мужавҳарлар билан ўлчаб бўлмайди. Беньков бир устоз ўлароқ юзлаб шогирдлар чиқарди.

Тошкентда уй-музейи бўлган Ўрол Тансиқбоев қозоқ эди. Алишер Қодиров гапидан келиб чиқсак, Ўрол оғани ўролмон қилиб қозоққа ҳайдаш керак. Ҳолбуки Ўрол Тансиқбоев – бу ўзбек рассоми.

Николай Қорахон деган рассом Нахичевонда туғилган, Надежда Кашина эса Пермда. Нима қилайлик? Улар Ўзбекистонга келиб чизган асарларини мусорга ташваорайликми?

Ўзбекистондаги кўп рассомлар ўзига устоз деб биладиган Александр Волков Марғилонда ўрис врач оиласида туғилган. Отаси элнинг саломатлиги ҳақида қайғурган, ўғли эса Туркистон авангарди деган йўналишнинг булоқбошиси. Нима қилайлик бу улуғ рассомни?

Ўзбек рассоми дея дунёга номи таралган Чингиз Ахмаров тотор. Минг малак деган расм чизиб Европани лол қилган Леким Иброҳимов уйғур. Замонавий концептуал санъат бўйича Ўзбекистоннинг юзи ҳисобланган Вячеслав Ўринбоевич Охуновнинг онаси ўрис. Нима қилайлик? Ҳайдаб солайликми?

Этномиллатчилик – ўта ёқимсиз иллат. Бу иллат сассиғи Ўзбекистон парламенти ичидан таралаётгани ташвишли бир сигнал.

Тошкент доимо мультикультурал маскан бўлган. Бу шаҳарда Анна Ахматова яшаган ва ўзининг сара шеърларини ёзган.

Дарвоқе, Тошкентнинг Дархон даҳасидаги Анна Ахматова яшаган уйдан ёдгорлик лавҳасини ким олиб ташлади. Қодиров эмасми?