Бир вилоятда фаолият юритаётган қўшилган қиймат солиғи (ҚҚС) тўловчи тадбиркор Элтузарга мурожаат йўллаб, солиқ хизматларидан фойдаланишдаги қийинчиликлар юзасидан норозилигини билдирди.

Мурожаат муаллифининг айтишича, у тадбиркорлик фаолиятини вилоят марказидан 130 километр узоқда жойлашган туманда амалга оширади. Бироқ ҚҚС тўловчиси сифатида оддий солиқ масалаларини ҳал қилиш учун ҳам мунтазам равишда вилоят солиқ идорасига боришга мажбур бўлмоқда.

“4-5 йилдан бери солиққа оид энг оддий масалалар учун 130 километр йўл босиб сарсон бўляпмиз. Тумандаги бизга ўхшаган тадбиркорлар ҳам худди шундай аҳволда”, дейилади мурожаатда.

Тадбиркорнинг таъкидлашича, туманда солиқ инспекцияси мавжуд бўлса-да, ҚҚС тўловчиларига хизмат кўрсатилмайди. Уларнинг айтишича, “сиз вилоят ёки республика солиқ тўловчисисиз” деган важ билан тадбиркорлар орқага қайтарилмоқда.

Мурожаатда бу ҳолат тадбиркорларнинг вақти ва маблағига ортиқча юк бўлаётгани, айниқса чекка ҳудудларда фаолият юритаётган бизнес вакиллари учун катта муаммо экани қайд этилган.

Шунингдек, мурожаат муаллифи 2026 йил 6 апрель куни Президент иштирокида ўтказилган йиғилишда ҚҚС тўловчиларига туман даражасида хизмат кўрсатиш бўйича топшириқ берилганини эслатиб, орадан бир ойдан ортиқ вақт ўтганига қарамай, амалда ўзгариш сезилмаётганини таъкидлаган.

“Биз тадбиркорлар қачонгача ҳам солиқ тўлаб, ҳам сарсон бўламиз?” дея савол қўйган мурожаатчи мутасадди идоралардан мазкур масалага эътибор қаратишни сўраган.

Мурожаат муаллифи шахси сир сақланишини илтимос қилган.