Қарши шаҳридаги «Ерқўрғон» деҳқон бозорида харидор аёлнинг сумкасидан ҳамён ва пулларни яширинча ўғирлаган профессионал киссавурга бешинчи марта ҳукм ўқилди.

Суд ҳужжатларига кўра, воқеа 2026 йил 15 апрель куни содир бўлган. З.Б. бозорда ўзига нотаниш Ш.Зоировани кузатиб борган ва «Лабо» юк машинаси ёнида юзага келган тирбандликдан фойдаланиб, унинг сумкасидан қора рангли ҳамённи яширинча олган.

Ҳамён ичида 800 АҚШ доллари – ўша кунги курс бўйича 9 млн 708 минг 800 сўм, 150 минг сўм нақд пул, шунингдек, 2 та SIM-карта ва бошқа буюмлар бўлган.

«С поличным» ушланган ўғрига бу сафар 3 йил муддатга озодликни чеклаш жазоси тайинлади. Унга белгиланган вақтда яшаш жойидан чиқмаслик ҳамда назорат қилувчи орган розилигисиз яшаш жойини ўзгартирмаслик каби қўшимча чекловлар белгиланди.