Қашқадарё вилояти Қарши тумани Чоргумбаз маҳалласида яшовчи бир гуруҳ фуқаролар таҳририятга мурожаат йўллаб, қишлоқ хўжалигига мўлжалланган суғориладиган ерлар ноқонуний равишда сотилаётганини иддао қилди.

Мурожаат муаллифларининг таъкидлашича, Чоргумбаз ҳудудидаги пахта ва ғаллачиликка ихтисослашган фермер хўжалиги тасарруфидаги айрим ер майдонлари уй-жой ва савдо обектлари қуриш учун фуқароларга сотиб юборилмоқда.

Фуқаролар бу ҳақда илгари ҳам тегишли идораларга мурожаат қилганини, бироқ вазият ўзгармаганини айтмоқда. Аксинча, мурожаатда тилга олинган Бунёд исмли шахснинг фаолияти янада кенгайганини, у ўзининг юқори лавозимдаги танишларига таяниб иш юритаётганини даъво қилишмоқда.

Мурожаатчиларни энг кўп ташвишга солаётган масала — суғориладиган қишлоқ хўжалиги ерларининг турар жой қурилиши учун ажратилаётганидир. Уларнинг фикрича, бундай ерлар қишлоқ хўжалиги маҳсулотлари етиштириш учун сақлаб қолиниши керак.

Шунингдек, мурожаатда айрим ер участкалари бўйича сохта ҳужжатлар расмийлаштирилаётгани, аслида ҳеч қандай бино-иншоот бўлмаган майдонлар турар жой сифатида кўрсатилаётгани ҳақида ҳам даъволар келтирилган. Фуқаролар бу жараёнда айрим мансабдор шахслар ва ташкилотлар иштирок этаётган бўлиши мумкинлигини тахмин қилмоқда.

Мурожаат муаллифлари ўзларига нисбатан бошқа ёндашув қўлланаётганини ҳам қайд этган. Уларнинг айтишича, ўз уйларига оид ҳужжатлар масаласида катта миқдорда жаримага тортилган бўлсалар-да, бошқа ҳолатларда қонун талаблари эътибордан четда қолмоқда.

Фуқаролар суғориладиган ерларнинг ҳақиқий ҳолатини жойига чиқиб ўрганиш, ноқонуний равишда ажратилган ерлар бўлса, уларни аниқлаш ҳамда ҳужжатларни расмийлаштиришда қонун бузилишларига йўл қўйган мансабдор шахсларнинг ҳаракатларига ҳуқуқий баҳо беришни сўрамоқда.

Мурожаат муаллифлари ушбу ҳолат бўйича Коррупсияга қарши курашиш агентлиги, прокуратура ва бошқа масъул органларни холис ва ҳар томонлама текширув ўтказишга чақирган.