Ўзбекистон ва Грузия ўртасидаги муносабатлар сўнгги йилларда нафақат сиёсий-дипломатик, балки савдо-иқтисодий ва транспорт-логистика йўналишларида ҳам тобора мустаҳкамланиб бормоқда. Икки давлат ўртасидаги алоқаларнинг амалий мазмун касб этаётгани эса янги лойиҳалар ва рақамли ечимларда яққол намоён бўлмоқда.

Бунинг навбатдаги мисоли — Ўзбекистон Республикаси Транспорт вазирлиги томонидан Грузия билан ҳамкорликда халқаро автомобил юк ташувларида электрон рухсатнома — Э-пермит тизимининг муваффақиятли жорий этилишидир.

Мазкур янгилик, аввало, халқаро юк ташувлари билан шуғулланувчи миллий ташувчилар учун қулайлик яратишга қаратилгани билан аҳамиятли. Эндиликда Грузия билан “икки томонлама”, “транзит” ҳамда “учинчи давлатга/учинчи давлатдан” йўналишларидаги рухсатномалар қоғоз шаклидаги тақсимланувчи бланкалар орқали эмас, балки ташувчиларнинг аризалари асосида электрон шаклда берилади.

Бу  оддийгина ҳужжат алмашинувидаги техник ўзгариш эмас. Э-пермит тизими халқаро автомобил ташувларида ортиқча бюрократик жараёнларни қисқартириш, рухсатнома олишни тезлаштириш ва инсон омилини камайтиришга хизмат қилади. Энг муҳими, ташувчилар учун янада шаффоф ва прогноз қилинадиган тизим шаклланади.

Бугунги халқаро савдода транспорт йўлакларининг самарадорлиги фақат автомобил йўлларининг ҳолати ёки географик масофага боғлиқ эмас. Ҳужжатларни расмийлаштириш тезлиги, чегаралардан ўтишдаги қулайлик, рақамли хизматларнинг ривожланганлиги ҳам логистика харажатлари ва етказиб бериш муддатига бевосита таъсир кўрсатади.

Шу нуқтайи назардан, Э-пермит тизимининг жорий этилиши Ўзбекистоннинг халқаро транспорт тизимларини рақамлаштириш борасидаги сиёсатига ҳамоҳангдир. Қоғоз ҳужжатлар ҳажмининг қисқариши, маълумотларнинг электрон шаклда юритилиши ва жараёнларнинг автоматлаштирилиши ташувчилар учун вақт ва ресурсларни тежаш имконини беради.

Ўзбекистон ва Грузия ўртасидаги ҳамкорликнинг кучайиб бораётганини айнан транспорт соҳаси мисолида ҳам кўриш мумкин. Чунки Грузия Ўзбекистон учун Европа бозорларига чиқиш имкониятларини кенгайтирувчи муҳим транспорт-логистика йўналишларидан бири ҳисобланади.

Шу боис икки мамлакат ўртасида юк ташиш тартиб-таомилларини соддалаштириш нафақат ташувчилар учун қулайлик, балки ўзаро савдо ҳажмини ошириш ва транспорт коридорларининг жозибадорлигини кучайтириш учун ҳам муҳим омилдир.

Айниқса, сўнгги даврда Ўзбекистон ва Грузия ўртасидаги сиёсий мулоқот, савдо-иқтисодий алоқалар ва туризм соҳасидаги ҳамкорликнинг фаоллашаётгани фонида транспорт йўналишидаги бундай амалий қадамлар икки давлат ўртасидаги яқинлашувнинг мантиқий давоми сифатида намоён бўлмоқда.

Умуман олганда, Э-пермит тизимининг жорий этилиши Ўзбекистон–Грузия муносабатларида “яқин ҳамкорликдан амалий шериклик сари” тамойилининг кучайиб бораётганини кўрсатади. Чунки давлатлар ўртасидаги алоқаларнинг мустаҳкамлиги, аввало, фуқаролар ва тадбиркорлар ҳаётида сезиладиган аниқ қулайликлар билан намоён бўлади.

Бугун транспорт соҳасида яратилаётган мана шундай рақамли ва замонавий механизмлар эртага икки давлат ўртасидаги савдо ҳажми, логистика имкониятлари ва иқтисодий ҳамкорликнинг янада кенгайишига хизмат қилиши мумкин.