Бир гала ўзбек артистга «Буюк хизматлари учун» деган орден берилди. Нима буюк хизмат қилди улар? Театрда ишласа, ойлигини, кинода кўринса, гонорарини, тўйларда ўртакаш-очарчилик қилса, тушган пулдан қисм-қисм об юрган зеҳн даражаси ўртадан паст яратиқлар.

Мана Эркин Комилов. Гаплашиб кўрсангиз, нуқул еган овқатию фалончи ака билан алоқаси яхшилигини гапираверади. Вульгар, уятсиз анекдотлар айтади.

Нарх-наволар ошганда, қўто борми Тошкентда деганга ўхшаган.

Шуларам ўртамиёна одам-да энди. Умуман, ўзбек адабиётчилари билан солиштирганда, артистлар ўта жоҳил ва саводсиз.

Туркияда Ўқтой Қайнарча деган артист бор. «Қуртлар водийси»да ўйнаган. Ҳозир «Аданали» деган фильмда крейзи полициячини ўйнагани билан машҳур бўлган. TV да «Миллионер» деган кўрсатувни ҳам оборади. Шу одам билан бир йиғинда бирга бўлиб қолдим.

Очиғи, мен «Қуртлар водийси» ёки «Шайтанат» дегич киноларни кўргим келмайди. Узоқдан тургичман. Шу боис Ўқтой Қайнарчини ҳам ўзи ўйнаган роллардаги каби жоҳил бўлса керак деб, ундан узоқлашдим. У бўлса орқамдан келиб, «Сен ўзбек бўлсанг керак, акцентингдан билдим», деб самимий кулди. Бир стакандан чой олиб, «ағдан-бағдан» гаплашдим. Ўқтой Қайнарча ўзи ўйнаган роллардан бом-бошқа зиёли ва ойдин бир киши экан.

Сиёсатдан тортиб, Барселонадаги юз йилдан бери қурилаётган архитектура шедевригача гаплашдик. Ғоят ўқимишли ва нуктадон киши экан. Мен умримда бундай закий одамни оз кўрганман. Аммо кўрганларим артист эмас, филолог эди.

Раҳматли Нажмиддин Комилов, Иброҳим Ҳаққул ва Аҳмад Аъзам билан суҳбатлашиб, ичим ёришарди. Театр режиссёри раҳматли Баҳодир Йўлдошев ҳам шундай суҳбатдош эди. Аммо бундай заковатни мен Эркин Комиловда кўрмадим. Майли, ҳаққини емайлик. Раҳматли Ҳожиакбар Нурматов ўта билимдон, ўз соҳасини яхши билган теран одам эди. Ҳожиакбар акани у киши Берлинга тадбирга келганида яқиндан танидим.

Суҳбатдан кўнглим тўлди. Аммо кейинчалик ўнлаб, балки юзлаб артистлар билан матбуот учун суҳбат қилганимда, энсаларим қотиб кетарди. Уларнинг космик даражада аҳмоқлиги, иззатталаблиги ва танқидни кўтара олмайдиган жиззакилигини кўриб, кўнглим қолди.