Элтузар таҳририятига Ўрмон хўжалиги илмий-тадқиқот институтининг бир гуруҳ ходимлари номидан мурожаат келиб тушди. Улар илмий тадқиқотлар учун ажратилган маблағлар олимларга етиб бормаётганини, институтнинг икки йил аввал капитал таъмирланган бинолари эса яна таъмирланаётганини даъво қилмоқда. Мурожаатда маблағларнинг бир қисми раҳбарларга «откат» сифатида қайтарилаётгани ҳақида ҳам жиддий айблов бор. Элтузар бу даъволарни мустақил тасдиқлагани йўқ. Қуйида мактубнинг таҳрирланган матни тўлиқ келтирилади.

Видео

Янгига ўхшаган ромлар, қурилиш материаллари ва бузилаётган бино — воқеликни видеода кўринг.

«Ассалому алайкум, ҳурматли Элтузар жамоаси!

Биз Ўрмон хўжалиги илмий-тадқиқот институтининг бир гуруҳ ходимлари номидан сизга мурожаат қиляпмиз. Бундан аввал ҳам кўплаб юқори ташкилотларга мурожаат қилдик, аммо ҳеч қандай натижа бўлмади.

Институтимизга ҳар йили давлат бюджетидан илмий тадқиқотлар ва лойиҳалар учун миллиардлаб сўм маблағ ажратилади. Аммо, бизнинг фикримизча, бу маблағнинг тўртдан бир қисми ҳам олимларга етиб келмайди. Маблағларнинг катта қисми биноларни таъмирлаш, раҳбарларнинг хизмат сафарлари ва хориждан келган меҳмонлар учун зиёфатлар уюштиришга сарфлангани ҳужжатларда кўрсатилади. Бизда эса ушбу харажатларнинг бир қисми раҳбарларга «откат» тарзида қайтиб келаётгани ҳақида жиддий шубҳа бор.

Аниқ мисол келтирамиз. Институтимизнинг икки асосий биноси икки йил аввал тўлиқ капитал таъмирдан чиқарилган эди. Бинолардан бирига ходимлар кўчиб ўтди. Иккинчисига эса кўчиб ўтишга ҳам улгурмаган эдик. Шунга қарамай, жорий йилда ушбу биноларни яна капитал таъмирлаш ҳақида буйруқ қабул қилинди.

Бинолардаги янги эшик ва ромлар чиқиндига ташлаб юборилди. Том қисмидаги янги қурилиш материаллари ҳам олиб ташланмоқда. Яп-янги мебеллар эса кўчага чиқариб қўйилмоқда.

Биз, олимларни ташвишга солаётган масала шуки, таъмир ва турли зиёфатлар учун миллиардлаб сўм сарфланаётган бир пайтда илмий тадқиқотлар етарлича маблағ билан таъминланмаяпти. Ҳатто лойиҳаларимиз учун бюджетдан тасдиқланган маблағларни ҳам ололмаяпмиз.

Ҳар йили шу мазмунда Экология ва иқлим ўзгариши миллий қўмитаси ҳамда Вазирлар Маҳкамасига мурожаат қиламиз. Аммо ҳозирга қадар ҳеч қандай ўзгариш бўлмади. Шу боис бу муаммоларни жамоатчилик ва масъул раҳбарият эътиборига етказишда амалий ёрдам беришингизни сўраймиз.

Ҳурмат билан,
Ўрмон хўжалиги илмий-тадқиқот институтининг бир гуруҳ олимлари.»