Тошкент шаҳрининг Олмазор туманида тўққиз қаватли турар жой биноси ёнида қазилган котлован грунтининг қулаб тушиши қурилиш лойиҳаси ва ушбу ернинг хусусий компанияга қандай ўтказилганига оид жиддий саволларни юзага чиқарди.

Ҳодиса 2 август куни меҳмонхона апартаментлари қурилаётган майдонда содир бўлган.

Anhor.uz олган ҳужжатларга кўра, қурилаётган объект билан ёнидаги тўққиз қаватли бино ўртасидаги масофа 12 метр этиб белгиланган. Нашр келтирган маълумотларда эса амалдаги қурилиш меъёри бундай ҳолатда 15 метрлик масофани талаб қилиши қайд этилган.

Лойиҳа бўйича котлован грунт барқарорлигини сақлайдиган қия деворлар билан қазилиши керак эди. Аммо амалда у деярли тик ҳолатда қазилган. Бундай вазиятда грунт босимини махсус муҳандислик конструкциялари ушлаб туриши лозим, бироқ келишилган лойиҳада бундай мустаҳкамлаш кўзда тутилмаган.

Видео

Собиқ мактаб ҳудудидаги котлован нега қулаб тушди? Видеони томоша қилинг

Ҳужжатларни ўрганиш жараёнида қурилиш майдони аввал таълим тизимига қарашли бўлгани маълум бўлган. Кадастр маълумотларига кўра, 2019 йил декабрь ойида бино ва 3 006 квадрат метр ер майдони 243-сонли мактаб номига расмийлаштирилган.

Орадан беш ой ўтмай, 2020 йил 8 майда Давлат активларини бошқариш агентлигининг Тошкент шаҳар ҳудудий бошқармаси «ДОНМАҲ-ИМЕХ» МЧЖ билан инвестиция мажбуриятлари назарда тутилган олди-сотди шартномасини тузган. Объект очиқ аукционсиз сотилган.

Мавжуд ҳужжатларда объект айнан шу компанияга қайси қарор асосида берилгани, харидор қандай танлангани ва бино ҳамда ер учун қанча маблағ тўлангани кўрсатилмаган.

Компания 2019 йил февраль ойида рўйхатдан ўтган бўлиб, унинг асосий фаолият тури дон, уруғ ва чорва емларининг улгуржи савдоси сифатида қайд этилган.

Шунингдек, компания қандай объект қуриш ёки реконструкция қилиш мажбуриятини олгани, инвестиция шартлари бажарилган-бажарилмагани ва собиқ мактаб мулки қандай асосда меҳмонхона апартаментлари лойиҳасига айлантирилгани ҳам очиқ қолмоқда.