АҚШда яшовчи яҳудий сиёсатшунос ва профессор Норман Финкельштейн Исроилнинг Ғазодаги сиёсати ҳақида яна кескин баёнотлар берди. Унинг фикрлари ижтимоий тармоқларда кенг муҳокамага сабаб бўлди.

Финкельштейннинг таъкидлашича, муаммо фақат Исроил бош вазири Биньямин Нетаньяҳу билан чекланмайди.

«Муаммо Нетаньяҳуда эмас. Муаммо бутун Исроил жамиятида», – деди у.

Олимнинг айтишича, Исроил жамиятининг катта қисми Ғазода бегуноҳ тинч аҳоли йўқ, деб ҳисоблайди. У бу қарашни қўллаб-қувватловчилар улушини тахминан 70–75 фоиз деб баҳолаган.

Энг баҳсли баёнотларидан бирида Финкельштейн Исроилни болалар ўлими учун масъул деб айблаб, «Исроил болаларни ўлдиришни худди хоббидек қилиб олган», деган кескин иборани ишлатди.

Финкельштейн аввал ҳам Ғазодаги уруш ва Исроил армиясининг ҳаракатлари ҳақида танқидий фикрлар билдириб келган. У халқаро ҳуқуқ нуқтаи назаридан ҳам Исроилнинг тинч аҳолига қарши амалларини қаттиқ танқид қилиб, уларни жиддий ҳуқуқбузарликлар сифатида баҳолаган.

Профессорнинг бу баёнотлари Исроил ва Фаластин ўртасидаги можаро юзасидан халқаро майдонда давом этаётган баҳсларга яна янги туртки берди.