Наманган вилоятидан бир гуруҳ тадбиркорлар Бизнесни ривожлантириш банки (BRB) бошқарув раиси Сахий Аннақличев номига мурожаат йўллашди. Унда вилоятдаги банк фаолияти, хусусан, раҳбар кадрлар билан боғлиқ ҳолатлар юзасидан жиддий эътирозлар билдирилган.

Мурожаатчилар BRB банкининг Наманган вилоятидаги раҳбари сифатида фаолият юритаётган Авaзбек Султонов тадбиркорларга босим ўтказишда айблаганлар.

Тадбиркорлар таъкидлашича, у доимий равишда уларни турли текширув органлари, жумладан, прокуратура ва департамент орқали жазолаш билан таҳдид қилиш амалиётини йўлга қўйган.

Шунингдек, мурожаатда банк тизимида шаффофлик йўқлиги, кредит ажратиш жараёнларида таниш-билишчилик устуворлиги қайд этилган. Айрим ҳолатларда кредитлар асосан раҳбарга яқин шахсларга берилаётгани, ташқи тадбиркорлар эса банк хизматларидан фойдалана олмаётгани айтилган.

Тадбиркорларнинг фикрича, ипотека ва бошқа кредит турларида ҳам воситачилар орқали ишлаш тизими шаклланган. Бу эса оддий фуқароларнинг молиявий ресурсларга етишига тўсқинлик қилмоқда.

Мурожаатда яна таъкидланишича, Авaзбек Султоновнинг Норин тумани собиқ ҳокимининг ўғли бўлгани туфайли унга қарши очиқ фикр билдиришдан кўпчилик чўчимоқда. Бундай ҳолатлар эса тадбиркорлик муҳитига салбий таъсир кўрсатаётгани урғулаб ўтилган.

Шу муносабат билан мурожаат муаллифлари Бизнесни Ривожлантириш Банки банки бошқарувидан мазкур ҳолатларни чуқур ўрганиш, масъул раҳбар фаолиятини тафтиш қилиш ҳамда адолатли қарор қабул қилишни сўрашган.

Масала юзасидан расмий муносабат билдирилса Элтузар уни нашр қилишга тайёр.