Латвияда айрим Ўзбекистон фуқаролари содир этган жиноятлар ортидан барча ўзбекистонликларга виза беришни вақтинча чеклаш ташаббуси кўтарилди. Аммо Ўзбекистон ТИВининг тезкор дипломатик аралашувидан кейин Рига амалдаги виза тартибини ўзгартиришга ҳожат йўқлигини билдирган.

Латвия ички ишлар вазири Янис Домбрава қисқа вақт ичида мамлакатга келган бир неча Ўзбекистон фуқароси, жумладан вояга етмаганларга қарши жиноятлар содир этганини айтиб, ўзбекистонликларга виза беришни маълум муддатга тўхтатишни таклиф қилган эди. Масала 29 сентябрда ҳукумат муҳокамасига олиб чиқилиши кутилган, аммо коалициядаги бошқа партиялар уни кун тартибига киритишга тайёр бўлмаган.

Тошкент бу ташаббусга жиддий дипломатик масала сифатида муносабат билдирди. Ўзбекистоннинг Ригадаги элчихонаси Латвия бош вазири офиси, ТИВ, Иқтисодиёт вазирлиги ва президент маъмурияти билан музокаралар ўтказди. ТИВнинг консуллик-ҳуқуқий департаменти ҳам Латвиянинг Ўзбекистондаги элчихонаси билан мулоқот қилган.

Ўзбекистон томони Ригага бундай чеклов икки давлат муносабатларига таъсир қилиши мумкинлигини очиқ етказган. ТИВ матбуот котиби Омонулла Файзиевга кўра, музокаралар натижасида Латвия томони амалдаги тартибни ўзгартириш зарурати йўқлигини маълум қилган.

Бу дипломатик жиҳатдан Тошкент учун муҳим натижа. Чунки бир неча шахснинг жинояти учун бутун бир мамлакат фуқароларига жамоавий чеклов қўйилишига йўл қўйилмади.

Бироқ ТИВ ўзбекистонликларни ҳам огоҳлантирди: хорижда маҳаллий қонунлар, урф-одат ва анъаналарга қатъий риоя қилиш зарур. Алоҳида шахсларнинг қилмиши қонуний равишда ўқиётган, ишлаётган ёки саёҳат қилаётган минглаб бошқа Ўзбекистон фуқароларига ҳам салбий таъсир кўрсатиши мумкин.

Бу огоҳлантириш бежиз эмас. 1 октябрда Латвия икки Ўзбекистон фуқаросининг вақтинчалик яшаш рухсатини бекор қилди. Улар Царникавада оққушни қийнаганликда айбдор деб топилган ва мамлакатни тарк этиш учун етти кун муҳлат олган.

Латвия можароси бир муҳим ҳақиқатни кўрсатди: хорижда бир неча фуқаронинг қилмиши бутун миллат паспортига нисбатан муносабатни ўзгартириши мумкин. Бу сафар Тошкент дипломатик йўл билан умумий чекловнинг олдини олди. Кейинги сафар эса бу қадар осон бўлмаслиги мумкин.