Куба ҳудудида оммавий электр энергияси узилишлари кузатилмоқда. Бу ҳақда мамлакат давлат энергетика компанияси хабар қилди.

Июль ойининг ўзида Кубада уч марта йирик миқёсда электр таъминоти издан чиққан эди. Расмий маълумотларга кўра, бунга асосий сабаб электр станциялари учун ёқилғи танқислиги бўлган.

Ушбу энергетик инқирозга АҚШнинг Кубага нисбатан юритган сиёсати ҳам таъсир кўрсатди. Жумладан, жорий йил бошида АҚШ томонидан Кубага ёқилғи етказиб бериш тўхтатилди.

Кейин эса Дональд Трамп Кубага нефть етказиб берувчи давлатларга нисбатан божлар жорий қилди. Бу эса орол давлатига ёқилғи етказиб беришни янада қийинлаштирди.

Вазиятни оғирлаштирган омиллардан бири Венесуэладаги сиёсий ўзгаришлар бўлиб, Кубанинг асосий нефть етказиб берувчиларидан бири ҳисобланган ушбу мамлакатдан таъминот кескин қисқарди.

Ҳозир оролда энергетика тизими жиддий танқислик босими остида қолмоқда.