Ўзбекистонда коррупцияга оид жиноятлар учун жавобгарлик янада кучайтирилмоқда. Олий Мажлис Сенати 13 июнь куни коррупцияга қарши курашиш самарадорлигини ошириш ва коррупциявий жиноятлар учун жазо муқаррарлигини таъминлашга қаратилган қонунни маъқуллади.

Қонун билан Жиноят кодексига “коррупцияга оид жиноятлар” деган алоҳида тушунча киритилиб, бундай жиноятларнинг аниқ рўйхати белгилаб қўйилмоқда. Бу суд ва тергов амалиётидаги талқинлар, айрим ҳолларда эса “бу коррупциями ёки оддий жиноятми?” деган баҳсларга чек қўйиши керак.

Энг муҳим ўзгаришлардан бири – пора олиш, пора бериш ва пора олди-бердисида воситачилик қилганлик учун ҳукм қилинган шахсларга жазони ўташдан муддатидан илгари шартли озод қилиш институти қўлланилмайди. Яъни бундай жиноятлар учун жазоланганлар белгиланган муддатни енгил йўл билан қисқартириш имкониятидан маҳрум бўлади.

Шунингдек, хизмат мавқеидан фойдаланган ҳолда содир этилган фирибгарлик учун жазо оғирлаштирилмоқда. Бу ҳолат Жиноят кодексининг 168-моддаси тўртинчи қисмига – ўта оғир жиноятлар тоифасига ўтказилиб, бундай қилмиш учун 10 йилгача озодликдан маҳрум қилиш жазоси назарда тутилмоқда.

Қонун хусусий ва нодавлат сектордаги коррупцион муносабатларга ҳам дахл қилади. Нодавлат ташкилоти хизматчисини пора эвазига оғдириб олиш учун жавобгарлик чоралари кучайтирилмоқда. Бу амалда коррупция фақат давлат идораларида эмас, хусусий ва нодавлат соҳада ҳам ҳуқуқий оқибатга эга эканини англатади.

Бундан ташқари, Маъмурий жавобгарлик тўғрисидаги кодексда давлат харидлари ва бюджет тизимидаги қонунбузилишлар учун санкциялар кучайтирилади. Бу бюджет маблағлари ва давлат буюртмалари атрофидаги қонунбузарликларга нисбатан назорат кучайишига хизмат қилиши айтилмоқда.

Сенаторлар маъқуллаган қонун Президент томонидан имзоланиб, расмий эълон қилинганидан кейин кучга киради.