Май ойидан газ,  электр-энергияси қимматлашиши ҳақидаги хабарлар ўртаҳол аҳоли қатламини ғашлантиряпти.

Ҳар ой янги қарор, ҳар ой янги чеклов ёки муаммо яратиляпти. Лекин нега шу ўзгаришлар доим оддий одамнинг елкасига тушади? Нега “ислоҳот” деган сўз халқ учун енгиллик эмас, доим юк бўлади?

Бугун ўртача маош коммунал тўловлар ва еб-ичардан ортмайди – газ, электр, сув, чиқинди тўловлари мунтазам ошиб бормоқда.

Дорилар, кийим-кечак, йўл кирачи? Ўртаҳол оилалар овқат масаласида аллақачон тежамкорлик режимига ўтган: гўшт байрамга, тухум ҳисоблаб ейилади.

Бу ҳаёт эмас, бу тирик қолиш учун кураш.

“Бозор иқтисодиёти”, “энергия тежаш”, “тариф сиёсати” деган гаплар вазиятни юмшатмаяпти. Оддий инсон учун бу атамаларнинг аҳамияти нолга тенг, ой охирида пул етишмайди. Шу фонда ҳар қандай намойишкорона ҳашамат ва тадбирлар одамларни ғашлантириши табиий.

Наҳот бюджетни ямашнинг бошқа чораси бўлмаса?