Самарқанд вилояти Каттақўрғон туманидаги “Ganiev Abdumannon Abdurasulovich-GXA” фермер хўжалиги биржа орқали сотилган қарийб 36 тонна ғалла учун белгиланган муддатда пул ололмаётганини билдириб, Элтузар таҳририятига мурожаат қилди.

Мурожаатда келтирилишича, фермер хўжалигининг 35 863 килограмм ғалласи 2026 йил 8 сентябрда Ўзбекистон Республикаси товар-хом ашё биржаси электрон савдолари орқали Самарқанд вилояти Пастдарғом туманидаги “AGROFEED” МЧЖ томонидан сотиб олинган.

Томонлар ўртасидаги №8757710-сонли олди-сотди шартномаси бўйича маҳсулотнинг ҳар бир килограмми 3 351 сўмдан, умумий қиймати эса 120 176 913 сўм этиб белгиланган.

Фермернинг айтишича, шартнома шартларига мувофиқ харидор тўловни беш иш куни ичида амалга ошириши керак бўлган. Аммо мурожаат йўлланган вақтга келиб, савдодан қарийб саккиз кун ўтганига қарамай, маблағ тўланмаган.

Мурожаат муаллифи яна бир ҳолатдан хавотир билдирмоқда. Унинг даъвосига кўра, бу орада ғалланинг бозор нархи пасайган ва “AGROFEED” МЧЖ шартномани бекор қилишга ҳаракат қилаётган бўлиши мумкин.

«Фермер қишнинг совуғида, ёзнинг чилласида меҳнат қилиб етиштирган маҳсулотини сақловга қўяди, кейин биржа орқали сотади. Харидор эса нарх тушишини кутиб, кейин жарима тўлаб шартномани бекор қилиб кетаверса, фермер нима қилсин?» – дейилади мурожаатда.

Мурожаат муаллифи бундай ҳолатлар фермерларни нарх ўзгариши билан боғлиқ таваккалчилик олдида ҳимоясиз қолдириши мумкинлигини таъкидламоқда. Унинг фикрича, биржада тузилган шартномалар бўйича харидорнинг тўлов мажбуриятлари амалда қатъий бажарилиши керак.

Элтузар мазкур мурожаатда келтирилган даъволар юзасидан “AGROFEED” МЧЖ ҳамда тегишли биржа ва назорат идораларининг муносабатини эшитишга тайёр. Таҳририятда ҳозирча шартнома бекор қилингани ёки компания айнан шу мақсадда тўловни кечиктираётганини мустақил тасдиқловчи маълумот мавжуд эмас.