Россиянинг Иркутск вилояти Шелехов шаҳрида 28 ёшли аёлнинг ўлатдан вафот этгани ҳақидаги хабар жамоатчиликда жиддий хавотир уйғотди. Расмий маълумотларга кўра, аёл вафотидан сўнг у билан алоқада бўлган 197 киши тиббий назоратга олинган, уларнинг 189 нафари госпитализация қилинган. Шелехов район шифохонасининг айрим бўлимларида карантин чоралари жорий этилган. Бурятия раҳбари Алексей Цыденов ҳам аёлнинг ўлатдан вафот этганини тасдиқлаганди. Демак, воқеа анча ҳавотирли. Маҳаллий нашрлар ёзишича, улар орасида Россия фуқаролигини олган ўзбеклар ҳам борлиги айтилмоқда .

Воқеанинг энг ташвишли жиҳати марҳуманинг противочума институтида лаборант бўлиб ишлаганидир. Айрим маҳаллий нашрлар 25 сентябрь куни лабораторияда ўлат қўзғатувчиси бўлган пробирка сингани ва шундан кейин унинг аҳволи ёмонлашганини ёзмоқда. Бироқ бу версия ҳозирча расмий идоралар томонидан тўлиқ тасдиқланган эмас. Шу боис воқеага муносабатда эҳтиёткорлик зарур: тахминни аниқланган факт сифатида тарқатиш жамоатчилик орасида асоссиз ваҳима келтириб чиқариши мумкин.

Бу ҳолатнинг яна бир муҳим жиҳати ўлат каби ўта хавфли инфекциялар билан ишлайдиган лабораторияларда биологик хавфсизлик талаблари қанчалик муҳим эканини кўрсатиши. Айни пайтда 189 кишининг касалхонага ётқизилгани уларнинг барчаси ўлат билан касалланганини англатмайди. Улар асосан эҳтимолий контактлар сифатида тиббий кузатувга олинган. Айрим беморларда симптомлар кузатилиши мумкин, аммо бунинг ўзи инфекция тасдиқланганини билдирмайди, лаборатория таҳлиллари ҳал қилувчи аҳамиятга эга.