16 октябрдан бошлаб «Uzbekistan Airways» авиакомпаниясининг Ўзбекистон бўйлаб ички рейсларига чипталар нархи ўртача 20 фоизгача пасайтирилади. Бу ҳақда Рақобат қўмитаси хабар берди.

Маълум қилинишича, чипталар нархининг арзонлаштирилиши ички авиақатновлар сонини кўпайтириш ва ташиш харажатларини мақбуллаштириш билан боғлиқ. Ички рейслар кўламини кенгайтириш орқали йўловчилар учун авиақатновлардан фойдаланиш имкониятларини ошириш ҳамда хизматлар нархини мақбуллаштириш кўзда тутилган.

Қайд этилишича, Президент топшириғига мувофиқ, авиация бозоридаги нархлар, тарифлар ва хизмат кўрсатиш имкониятлари ўрганилган. Ўрганишлар натижасида ташиш харажатларини мақбуллаштириш ва авиачипталар нархини пасайтириш бўйича таклифлар ишлаб чиқилган.

Ушбу таклифлар асосида «Uzbekistan Airways» авиакомпанияси билан ҳамкорликда ички авиақатновлар тарифлари қайта кўриб чиқилган.

Янги тарифлар 16 октябрдан амалга киритилиши кутилмоқда. Натижада мамлакат ичида ҳаво транспорти орқали ҳаракатланувчи йўловчилар учун авиачипталар нархи янада қулайлашади.