Элтузга етиб келган сурат ўзбек жамияти учун жуда оғир саволни яна кун тартибига чиқарди.

Фаррух Закировдек Ўзбекистон санъатида катта номга эга инсон Россия элчихонасида Георгий тасмаси билан кўриниш берибди. Бу ёғи энди оддий “маданий тадбир”дан ошиб тушди. Бугунги геосиёсий вазиятда босқинчи лентасини тақиб олиш нейтрал позиция рамзи эмас.

Георгий тасмаси бугун кўпчилик учун фақат Иккинчи жаҳон уруши хотираси эмас. У Россия империялистик сиёсати, Украинага қарши уруш, “ўрис дунёси” тарғиботи ва Кремль пропагандаси билан чамбарчас боғланган сиёсий белгига айланган.

Шундай экан, нега Ўзбекистоннинг Халқ Артисти бу лентани тақиб Россия элчихонаси саҳнасида туриб қўшиқ айтиши керак?

Нега ўзбек санъати ва ўзбек маданияти Россия давлат пропагандаси учун супурги бўлиб хизмат қилиши керак?

Биз бундай инсонлар номини Тошкентдаги мактабларга берамиз. Болалар ўқийдиган, келажак авлод тарбияланадиган масканларни уларнинг шарафига атаймиз…

Мактабга кимнинг номи берилади? Фақат машҳур одамнингми? Ёки жамият учун маънавий намуна бўла оладиган инсоннингми?

Санъаткорнинг истеъдоди унинг ҳар бир сиёсий танловини оқлаб бермайди. “У катта артист” деган гап ҳамма нарсага индульгенция эмас.

Бугун Ўзбекистонга Кремль рамзларини тақиб саҳнага чиқадиган “маданий элита” эмас, мустақиллик қадрини тушунадиган зиёлилар керак.

Чунки мустақиллик фақат байроқ, мадҳия ва 1 сентябрь эмас.

Мустақиллик, аввало, кимнинг олдида қўшиқ айтаётганингни, қандай рамзни кўкрагингга таққанингни ва бу билан кимга хизмат қилаётганингни англашдир.

В честь таких людей мы называем школы в Ташкенте?

Бу савол фақат Фаррух Закиров ҳақида эмас. Бу савол бизнинг жамиятимиз ҳақида.

Биз болаларимизга қандай намуна кўрсатяпмиз?