Эроннинг Мозандарон вилоятида суд Қулсум Акбарий исмли аёлни 11 нафар собиқ эрини заҳарлаб ўлдирганликда айбдор деб топиб, унга 10 та ўлим жазоси тайинлади. Бу ҳақда Iran International Эрон ОАВларига таяниб хабар берди.

Маълумотларга кўра, 1967 йилда туғилган Акбарий тахминан 20 йил давомида ёши катта эркакларни нишонга олган. Тергов версиясига кўра, у ўзини ёлғиз ва кекса эркакларга ғамхўр ҳамроҳ сифатида кўрсатган, уларга турмушга чиққан ва кейин уларни дори воситалари билан аста-секин заҳарлаган.

Прокурорлар уни диабетга қарши дорилар, тинчлантирувчи воситалар ва айрим ҳолларда саноат спиртидан фойдаланганликда айблаган. Қурбонлар кекса ва кўпинча касал бўлгани сабабли, уларнинг ўлими дастлаб табиий ҳолат сифатида қабул қилинган ва бу ҳолат жиноятларнинг узоқ йиллар давомида очилмай қолишига сабаб бўлган.

Иш 2023 йилда фош бўлган. Iran International хабарига кўра, Акбарий 82 ёшли эрини ўлдиришга уринганидан кейин қўлга олинган, эркак унинг шубҳали ҳаракатларини сезиб қолган. IranWire эса иш Азизуллоҳ Бобоийнинг ўлимидан кейин унинг ўғли шубҳа билдиргани ортидан очилганини ёзади.

Суд жараёнида Акбарий 11 та қасддан одам ўлдириш ва битта қотилликка уриниш бўйича айбланган. Маълумотларга кўра, жабрланувчилар оилаларидан 10 таси “қасос” жазосини, яъни ўлим жазосини талаб қилган. Бир оила эса қон пули эвазига қасос талабидан воз кечишга рози бўлган.

Суд Акбарийга 10 та ўлим жазосидан ташқари, сўнгги қотилликка уриниш иши бўйича яна 10 йил қамоқ жазоси ҳам тайинлаган.

Иш Эрондаги энг шов-шувли серияли қотиллик ишларидан бири сифатида баҳоланмоқда.

Матбуотда Акбарий “Эроннинг қора беваси” деб аталмоқда. Gulf News маълумотига кўра, ишда 45 дан ортиқ даъвогар иштирок этган.

Аёл қамоқда қатл этишларини кутиб кун ўтказмоқда.