Эрон агар АҚШ яна ҳарбий ҳужум бошласа, можаро Яқин Шарқ билан чекланиб қолмаслигини маълум қилди. Бу баёнот АҚШ президенти Доналд Трампнинг янги ҳарбий операцияни қайта бошлаш қарорига жуда яқин келганини айтганидан кейин янгради.

Трамп олти ҳафта аввал “Epic Fury” операциясини ўт очишни тўхтатиш ва дипломатик музокараларга имконият бериш мақсадида тўхтатган эди. Бироқ шундан буён урушни тугатиш бўйича музокаралар сезиларли натижа бермади.

Маълумотларга кўра, Эрон бу ҳафта АҚШга янги таклиф юборган. Аммо Теҳроннинг очиқ баёнотларида аввал ҳам Вашингтон томонидан рад этилган шартлар такрорланган. Улар орасида Ҳурмуз бўғози устидан назорат, уруш оқибатлари учун товон пули, санкцияларни бекор қилиш, музлатилган активларни озод этиш ва АҚШ қўшинларини минтақа ҳудудидан олиб чиқиш талаблари бор.

Доналд Трамп Оқ уйда журналистлар билан суҳбатда янги бомбардимон бошлаш ҳақида қарор қабул қилишга жуда яқин келганини айтди.

«Мен бугун қарор қабул қилишга бир соат қолган эдим», деди Трамп.

Эрон эса ҳар қандай янги ҳужумга жавоб қайтаришини яна бир бор таъкидлади. Аввалроқ Теҳрон АҚШ ҳарбий базалари жойлашган Яқин Шарқ давлатларига зарба бериш билан таҳдид қилган бўлса, бу сафар таҳдид доираси янада кенгайиши мумкинлиги билдирилди.

Инқилобий гвардия давлат ОАВ орқали тарқатган баёнотда шундай дейилди:

«Агар Эронга қарши тажовуз такрорланса, ваъда қилинган минтақавий уруш бу сафар минтақа доирасидан ташқарига ҳам ёйилади».

Сўнгги дипломатик ҳаракатлар доирасида Эроннинг Tasnim агентлиги Покистон ички ишлар вазири Теҳронга етиб келганини хабар қилди. Ўтган ой ўтказилган ягона тинчлик музокараларига мезбонлик қилган Покистон томонлар ўртасида хабар етказиш вазифасини ҳам бажариб келмоқда.