Колониядан шифохонага даволаниш учун чиқиш – одатда соғайиб, жазони давом эттириш учун бериладиган имконият.

Аммо Зафаробод туман суди кўрган ишда бу имконият бир маҳкум учун ўзига хос **«Тошкент тури»**га айланган.

Суд ҳукмига кўра, Э.Ш. аввал ҳам бир неча бор ўғрилик учун судланган ва жазо ўтаётган пайтида касаллиги сабаб Пахтакор туман сил касалликлари шифохонасига даволанишга юборилган.

Шифохонада у М.Шерматова исмли бемор аёл билан танишган. Аёл унга ишонган, ҳатто баъзан телефонини қўшиқ эшитиш ва қўнғироқ қилиш учун бериб турган.

2025 йил 13 ноябрь куни эса бу ишонч қимматга тушган.

Судда аниқланишича, аёл ухлаб қолгач, Э.Ш. унинг 2,1 миллион сўмлик Samsung A07 телефонини олиб, шифохонадан чиқиб кетган. Телефондаги илова орқали жабрланувчининг пластик картасидаги яна 2 миллион сўмни ҳам ишлатиб юборган.

Шундан кейин даволаниш режаси ҳам ўзгарган.

Маҳкум судда айтишича, у аввал таксида йўлга чиққан, кейин Тошкентга бориб, 19 кун давомида шаҳарда айланиб юрган. Картадаги пуллар эса асосан такси ва овқатланишга сарфланган.

Қисқаси, бировнинг пулига – транспорт бор, овқат бор, саёҳат бор.

Фақат рухсатнома йўқ.

Телефон эса кейин Наманганда нотаниш одамга сотиб юборилган. Э.Ш. 2025 йил 4 декабрь куни Юнусобод туманида ушланган. Судда у айбига тўлиқ иқрор бўлган ва қилмишидан пушаймонлигини айтган.

Воқеанинг яна бир аччиқ томони – пластик картадаги пулнинг 1,8 миллион сўми жабрланувчи аёлга кўзини даволатиши учун эҳсон сифатида тушган эди. Суд ҳужжатларида бу пул ҳам ўғирланган маблағ таркибида сарфлаб юборилгани қайд этилган.

Зафаробод туман суди Э.Ш.ни ЖКнинг 169-моддаси 3-қисми «а» банди билан айбдор деб топди.

Унга янги жиноят учун 5 йил қамоқ жазоси тайинланиб, аввалги ҳукм бўйича қолган жазонинг бир қисми қўшилди ва узил-кесил 5 йил 1 ой озодликдан маҳрум қилиш белгиланди.

Жазо қаттиқ тартибли колонияда ўталади. Шунингдек, маҳкумдан жабрланувчи фойдасига 2 миллион сўм моддий зарар ундириш белгиланган.

Шундай қилиб, колониядан даволанишга чиққан маҳкум шифохонадан Тошкентгача етиб борди.

Аммо 19 кунлик «саёҳат»нинг ҳисоб-китоби 5 йил 1 ой бўлиб чиқди.