Фарғона вилояти Данғара туманидаги «Agro Rishton Ta’mir Servis» МЧЖ ходими иш ҳақи ўз вақтида берилмаётгани ва ходимларнинг маоши солиқ органларига кам кўрсатилаётгани ҳақида Элтузарга мурожаат қилди.

Мурожаатчи корхонада ҳудуд назоратчиси бўлиб ишлашини айтган. Унинг даъвосига кўра, бош бухгалтер ходимларнинг ойлик маошини вақтида тўламайди ва солиқ ҳисоботларида иш ҳақи миқдорини амалдаги суммадан кам кўрсатади.

Мурожаатга Ўзбекистон Республикаси Солиқ қўмитаси тизими орқали олинган «Ҳисобланган иш ҳақи тўғрисида маълумотнома» ҳам илова қилинган.

Ҳужжатда «Agro Rishton Ta’mir Servis» МЧЖ томонидан бир ходимга 2026 йил февраль–июль ойларида жами 42 609 886 сўм иш ҳақи ҳисоблангани, ундан 5 113 186 сўм даромад солиғи ҳисоблангани кўрсатилган.

Хусусан, маълумотномага кўра:

  • февраль – 5 624 725 сўм;
  • март – 8 156 250 сўм;
  • апрель – 12 750 561 сўм;
  • май – 7 228 350 сўм;
  • июнь – 4 425 000 сўм;
  • июль – 4 425 000 сўм иш ҳақи ҳисобланган.

Июнь ва июль ойларида нафақат ҳисобланган иш ҳақи – 4 425 000 сўм, балки даромад солиғи ҳам бир хил – 531 000 сўмдан кўрсатилган.

Мурожаатчи эса бу ҳолат фақат унга эмас, бошқа ходимларга ҳам тегишли эканини иддао қилиб, июнь ва июль ойлари бўйича кўпчилик ишчиларга бир хил суммалар кўрсатилганини билдирмоқда.

«Ишчилар ойлик ололмай юрибди. Солиққа эса ойликларимиз кам кўрсатиляпти. Июнь ва июль ойларида ҳам бир хил ҳисобот тақдим этилган», – дейилади мурожаатда.

Ходим корхона таъсисчиси ва раҳбариятидан вазиятга изоҳ беришни талаб қилган. У мазкур ҳолат бўйича ваколатли давлат органларига ҳам мурожаат қилишини билдирган.

Айни пайтда, Элтузар ихтиёридаги ҳужжат бир ходимнинг солиқ тизимида акс этган ҳисобланган иш ҳақини тасдиқлайди. Бироқ маошнинг амалда кечиктириб тўлангани, солиқ органларига атайлаб кам кўрсатилгани ёки бошқа ходимлар бўйича ҳам худди шундай ҳисобот берилгани мазкур ҳужжатнинг ўзи билан тасдиқланмайди. Бу ҳолатлар ваколатли органлар текширувини талаб қилади.

Элтузар «Agro Rishton Ta’mir Servis» МЧЖ раҳбарияти ва бош бухгалтерининг ушбу даъволар бўйича муносабатини ҳам эълон қилишга тайёр.