АҚШ президенти Доналд Трамп Эроннинг урушни тўхтатиш бўйича музокаралар қандай бораётганидан тобора норози бўлиб бормоқда ва кенг кўламли ҳарбий ҳаракатларни қайта бошлаш эҳтимолини жиддийроқ кўриб чиқмоқда. Бу ҳақда CNN манбалари хабар берди.

Телеканал маълумотига кўра, Трамп Ҳурмуз бўғозининг ёпиқ қолиши, шунингдек, Эрон раҳбарияти ичидаги бўлинишлардан норози. Унинг фикрича, бу ҳолат ядровий музокараларда жиддий ён беришларга тўсқинлик қилмоқда.

CNN манбаларининг айтишича, Трамп “бутунлай қабул қилиб бўлмайдиган” деб баҳолаган Эроннинг сўнгги жавоби АҚШ маъмуриятида Теҳроннинг ҳақиқатан ҳам жиддий музокараларга тайёрлиги борасида шубҳаларни кучайтирган.

Оқ Уй ичида эса турли позициялар мавжуд. Айримлар, жумладан Пентагон расмийлари, Эронга босимни кучайтириш ва ҳатто мақсадли зарбалар бериш тарафдори. Улар бу орқали Теҳронни музокара столига қайтариш мумкин деб ҳисобламоқда.

Бошқа амалдорлар эса дипломатияга яна имконият бериш кераклигини таъкидламоқда.

Манбаларнинг сўзларига кўра, Трамп атрофидагилар Покистон воситачиларининг Эрон билан мулоқотда анча қатъий бўлишини хоҳламоқда. АҚШ расмийлари воситачилар Трампнинг норозилигини Теҳронга етарлича қаттиқ етказмаётганидан хавотирда.

Душанба куни Трамп Оқ уйда миллий хавфсизлик бўйича жамоаси билан яна йиғилиш ўтказиб, кейинги қадамларни муҳокама қилди.

Манбалар фикрича, муҳим қарорлар АҚШ президентининг 13-15 май кунлари режалаштирилган Хитой ташрифидан кейин қабул қилиниши мумкин.

7 апрель куни АҚШ Эрон билан урушда ўт очишни тўхтатиш бўйича келишув эълон қилган эди. 11 майда эса Трамп Теҳроннинг жавобидан кейин сулҳ “йўқ бўлиш ёқасида” турганини айтди.

“Улар юборган бемаъни таклифни ўқиб чиққанимдан кейин буни ҳозирча энг заиф таклиф деб атаган бўлардим. Ҳатто охиригача ўқимадим”, — деди Трамп.