Кеча, 10 июнь куни Элтузарга Бухоро туманида Шаҳзноза Аслонова билан боғлиқ ҳолат акс этгани айтилган мурожаат ва видео йўлланди. Мурожаатда таъкидланишича, Бухоро тумани ИИБнинг бир гуруҳ ходимлари 39 яшар ҳамшира Шаҳноза Аслонованинг яшаш уйига келиб, ўзларини таништирмаган ва хизмат гувоҳномаларини кўрсатмаган ҳолда уни мажбуран олиб кетган.

Видео

Ўғрилик гумони, наркология текшируви ва куч ишлатиш иддаоси — Бухородаги ҳолат изоҳ кутмоқда.


 
Мурожаат муаллифининг сўзларига кўра, ИИБ ходимлари Шаҳноза Аслоновани ўғрилик бўйича гумонланувчи эканини, кимдир унинг устидан ариза қилганини ва пул йўқолганини айтган. Шунингдек, уни мастлик ҳолатини аниқлаш мақсадида наркология диспансерига олиб боришаётганини билдиришгани иддао қилинмоқда.
 
Аслонова эса ўзига нисбатан қандай асосда куч ишлатилганини сўраган, бирор айби йўқлигини айтган. Мурожаатда келтирилишича, у уст кийими ва оёқ кийимини кийиб олишга рухсат сўраган, бироқ оёқ кийимини кийишига имкон берилмаган ва уйидан олиб чиқилган. Воқеа жойида маҳалла раиси ҳам бўлган ва ҳолатни телефонига тасвирга олиб турган.
 
Мурожаатда ИИБ ходимларининг ҳаракатлари юзасидан бир қатор саволлар қўйилган. Жумладан, агар ҳақиқатан ҳам ўғрилик ҳақида хабар келиб тушган бўлса, нега воқеа жойига тергов-тезкор гуруҳи чиқмагани, ҳодиса жойи кўздан кечирилмагани, далиллар тўпланмагани ва гувоҳлардан кўрсатма олинмагани сўралмоқда.
 
Шунингдек, фуқаро ўғриликда гумонланган тақдирда ҳам уни наркология диспансерига шошилинч тарзда олиб боришга қандай ҳуқуқий асос бўлгани савол остига олинган. Мурожаатда Шаҳноза Аслонованинг автомашина бошқармагани ёки жамоат тартибини бузмагани таъкидланиб, унинг мажбурий тиббий кўрикдан ўтказилиши қонунийлиги текширилиши сўралган.
 
Маълум қилинишича, тиббий кўрикдан сўнг Аслонованинг мастлик ҳолати аниқланмаган. Шундан кейин у ИИБ хизмат хонасига олиб борилиб, бир неча соат ушлаб турилгани айтилмоқда. Мурожаатда яна бир муҳим иддао келтирилган: Аслонова хизмат хонасига олиб келинганидан кейингина пул йўқолгани ҳақида аризачидан ариза ёздириб олингани билдирган.
Ҳозирда Аслонова оғир руҳий босим ва стресс ҳолатида экани, ИИБ ходимларининг ҳаракатлари унда қўрқув уйғотгани айтилмоқда. Мурожаат муаллифлари ҳолатга мутасаддилар эътибор қаратишини сўраган.
Аслонованинг таъкидлашича, агар ўғриликни у содир этгани исботланса, қонун олдида жавоб беришга тайёр. Бироқ айби бўлмаса, уни мажбуран олиб кетган ва унга нисбатан куч ишлатган ИИБ ходимларининг ҳаракатларига ҳуқуқий баҳо берилиши кераклигини айтмоқда.
Ҳолат юзасидан Бухоро вилояти ИИБ ва бошқа мутасадди идоралардан расмий изоҳ кутамиз.