Жиноят ишлари бўйича Бухоро шаҳар суди Бухоро давлат техника университетининг собиқ ўқитувчиси К.Ғни бир аёлга нисбатан шаҳвоний шилқимлик қилганлиги учун беш суткага қамади.

2026 йил 8 июлда чиқарилган суд қарорига кўра, ҳодиса 29 июнь куни Бухоро давлат техника университети биносида содир бўлган.

Суд ҳужжатида қайд этилишича, К.Ғ. университетда ишлаётган А.С.нинг олдига келиб, унинг танасининг турли қисмларига теккан. Жабрланувчи бу ҳаракатларни шаҳвоний шилқимлик деб баҳолаб, ҳуқуқни муҳофаза қилувчи органларга мурожаат қилган.

К.Ғ. судда айбига қисман иқрор бўлган. У оилавий шароит билан боғлиқ ҳолатлар сабаб ҳаяжонлангани ва ўз ҳаракатларини бошқара олмаганини билдирган. Шунингдек, қилмишидан пушаймонлигини айтиб, бундай ҳолат бошқа такрорланмаслигини маълум қилган.

Жабрланувчи эса Ғафуров иш вақтида унинг олдига келиб, танасининг турли қисмларига текканини тасдиқлаган ва унга нисбатан қонуний чора кўрилишини сўраган.

Суд маъмурий ҳуқуқбузарлик тўғрисидаги баённома, жабрланувчининг аризаси ва кўрсатмалари, тушунтириш хатлари, видеотасвирлар ҳамда ишдаги бошқа далилларни ўрганиб, К.Ғ.нинг ҳаракатларини Маъмурий жавобгарлик тўғрисидаги кодекснинг 41¹-моддаси 1-қисми билан малакалаган.

Суд қарори билан К. Ғ. 8 июлдан 13 июлгача қамағда ўтирди.

Шунингдек, ундан махсус қабулхонада сақлаш билан боғлиқ 309 минг сўм харажатни ундиришга қарор қилинган.