Бойсун тумани Хўжабулғон маҳалласи аҳолиси хавфли ҳолатдаги кўприк юзасидан мутасаддиларга мурожаат қилмоқда.

Маълум қилинишича, маҳаллани “Термиз-Бойсун” автомобиль йўли билан боғлаб турувчи кўприк анчадан буён ночор аҳволга келиб қолган. Ёғингарчилик кунларида, айниқса баҳор ойларида дарёдан келадиган сел оқими кўприкни янада емириб, ундан фойдаланишни кундан кунга қийинлаштирмоқда.

Видео

Бойсунда сел оқими кўприкни емириб, маҳалла йўлини хавфли ҳолатга келтирган. Аҳоли болалар ҳар куни шу йўлдан ўтишидан хавотирда.

Аҳолини энг кўп хавотирга солаётган жиҳат шундаки, ушбу кўприкдан ҳар куни болалар мактаб ва боғчага қатнайди. Кўприк атрофида етарли ҳимоя тўсиқлари ҳам мавжуд эмас. Шу сабабли ёмғирли ва қорли кунларда ота-оналар фарзандларини хавотир билан йўлга чиқаришга мажбур бўлмоқда.

Маҳалла аҳлининг айтишича, баъзи пайтларда болалар кўприкдан эсон-омон ўтиб олиши учун қишлоқ аҳолиси навбатчилик ҳам қилган.

“Ушбу муаммо бўйича туман ва вилоят ҳокимликларига йиллар давомида бир неча бор мурожаат қилганмиз. Аммо ҳозирча тайинли натижа бўлмаяпти. Мутасаддилардан мазкур масалани кечиктирмасдан ҳал этишларини сўраймиз”, дейилади мурожаатда.

(Видеодаги ҳолат шу йилнинг 23 апрель куни содир бўлган)