Россия Федерацияда туғилган Ўзбекистон фуқароси крипто-валюталар савдосини амалга ошириш ҳуқуқини берувчи лицензия олмасдан, “Binance” крипто-биржасида ўзининг профилни очиб, Ўзбекистон Республикаси ҳудудида ноқонуний равишда крипто-активлар савдосини амалга ошириш жиноий режасини тузди.

Жиноий режага кўра, “Binance” крипто-биржасидаги фойдаланувчининг профилида аноним крипто-активлар билан савдо қилишдаги даромадларини яширин қолинишини таъминлаш мақсадида, крипто-активларни сотиб олиш ва сотишда фойдаланиш учун электрон ҳамёнига пластик картани бириктириб қўйган.

Шундан сўнг у:

1) “Binance” крипто-биржасида номаълум шахснинг электрон ҳамёнига 840.85 USDT крипто-активларни ўтказган ҳолда, ушбу крипто-активларни 11.000.000 сўмга сотган.

2) Яна бир бошқа шахснинг электрон ҳамёнидан 381.33 USDT крипто-активларни олган ҳолда, ушбу крипто-активларни 5.000.000 сўмга сотиб олгани билан тақиқланган крипто-активлар айланмасини амалга оширган.

3) Ўзининг жиноий ҳаракатларини давом эттириб, номаълум шахс(лар) билан олдиндан тил бириктириб, такроран  “Binance” крипто-биржасида фойдаланувчининг электрон ҳамёнидан 1310.11 USDT крипто-активларни олган ҳолда, ушбу крипто-активларни 17.000.000 сўмга сотиб олган.

4) Омади келаётганидан ҳовлиқиб,  яна бир шахснинг электрон ҳамёнидан 255,59 USDT крипто-активларни олган. Ҳамда  ушбу крипто-активларни 3.300.000 сўмга сотиб олгани била тақиқланган крипто-активлар айланмасини амалга оширган.

5) Пул топишга берилиб кетган криптавалютачи номаълум шахснинг электрон ҳамёнидан 951.82 USDT крипто-активларни олган.  Ушбу крипто-активлар 12.278.478 сўмга баҳоланган.

6)  Кейин ҳам ўзининг жиноий ҳаракатларини давом эттириб, номаълум шахс электрон ҳамёнидан 500.05 USDT крипто-активларни олган ҳолда, ушбу крипто-активларни 6.400.640 сўмга сотиб олгани билан Ўзбекистон ҳудудида тақиқланган крипто-активлар айланмасини амалга оширган.

7) Бундан ташқари, Ш.Н. номаълум шахс электрон ҳамёнидан 1158.48 USDT крипто-активларни олган. Улар 15.000.000 сўмни ташкил этган.

8) У яна бир  электрон ҳамёнига 799.67 USDT крипто-активларни ўтказган ҳолда, ушбу крипто-активлар 10.306.947 сўмга баҳоланган.

9) Яна бир шахснинг электрон ҳамёнидан  эса 501.11 USDT крипто-активларни олган. Бу 6.497.000 сўмга тенг баҳоланган.

10) Электрон ҳамёндан яна бир уринишда 799.92 USDT крипто-активларни қўлга киритган. Бу эса 10.335.000 сўмга  тенг деб баҳоланган.

Хуллас, у бир йил ичида 78 та транзакция амалга ошириб, 79.634,92 USDT крипто-активларни қонунга хилоф равишда олиш, ўтказиш ва айирбошлаш билан шуғулланган.

Ш.Н. Ўзбекистон Республикаси ЖК 2788-моддаси 3-қисми “а” бандида назарда тутилган жиноятни содир этишда айбдор деб топилди ва 3 (уч) йил муддатга озодлиги чекланди.  Уйида ухлайди.