АҚШ разведкаси маълумотларига кўра, Эрон олий раҳбари Мужтабо Хоманаий махфий жойда сақланмоқда ва ташқи дунё билан алоқаси жуда чекланган. Бу ҳақда CBS News АҚШ расмийларига таяниб хабар берди.

Маълумотларга кўра, Хоманаий билан тўғридан-тўғри боғланиш имкони деярли йўқ. Ҳатто Эрон ҳукуматининг юқори мартабали амалдорлари ҳам унинг қаерда эканини билмайди ва унга хабарларни махсус чопарлар тармоғи орқали етказади. Шу сабаб Вашингтон томонидан юборилган таклифларга жавоб олиш узоқ вақт талаб қилмоқда.

CBS News ёзишича, бу ҳолат Трамп маъмурияти билан Эрон ўртасидаги эҳтимолий келишув жараёнини секинлаштирган. АҚШ расмийларидан бири ҳар бир хабар Хоманаийга кечикиб етиб боришини, унинг жавоблари ҳам кечикиб қайтишини айтган. Оқ уй эса Хоманаийнинг қаердалиги ёки алоқа усуллари ҳақида изоҳ беришдан бош тортган.

Шу билан бирга, CBS News хабарича, Трамп маъмуриятининг юқори лавозимли расмийси Эрон раҳбарияти келишув лойиҳасининг асосий доираларига “умумиятла” рози бўлганини билдирган. Келишув лойиҳаси Ҳурмуз бўғозини очиш ва Эроннинг юқори даражада бойитилган уран захираси бўйича механизм ишлаб чиқишни ўз ичига олади.

Президент Дональд Трамп келишув бўйича якуний жавоб яқин кунларда келиши мумкинлигини айтган. Бироқ CBS News манбаларига кўра, якуний келишув ҳали имзоланмаган ва жараён Эрон ичидаги мураккаб алоқа тизими сабаб яна чўзилиши мумкин.