АҚШнинг Anthropic компанияси томонидан яратилган «Mythos» сунъий интеллект моделига кириш имконияти дунёнинг аксар мамлакатлари учун чекланди. Semafor нашрининг хабар беришича, Вашингтон расмийлари мазкур технологиядан Хитой билан боғлиқ шахслар ёки ташкилотлар фойдаланган бўлиши мумкинлигидан хавотир билдирган.

Шу сабабли моделдан фойдаланишга оид қатор чекловлар жорий этилган. Манбаларга кўра, АҚШ ҳукумати илғор сунъий интеллект технологияларининг рақиб давлатлар қўлига ўтиши миллий хавфсизликка таҳдид солиши мумкин деб ҳисобламоқда.

«Mythos» Anthropic компаниясининг энг янги ва энг кучли сунъий интеллект моделларидан бири сифатида кўрилмоқда. У катта ҳажмдаги маълумотларни таҳлил қилиш, мураккаб масалалар бўйича хулоса чиқариш, дастурлаш, тадқиқотлар ўтказиш ва автоном қарор қабул қилиш қобилиятлари билан ажралиб туради. Айрим мутахассислар уни сунъий интеллект соҳасидаги энг илғор моделлар қаторига қўшмоқда.

Экспертлар таъкидлашича, агар Хитой бундай технологияга тўлиқ кириш имкониятига эга бўлган бўлса, у моделнинг ишлаш тамойилларини ўрганиб, ўзининг рақобатбардош тизимларини янада тезроқ ривожлантириш имконига эга бўлиши мумкин эди. Бу эса сунъий интеллект бўйича АҚШ ва Хитой ўртасидаги технологик рақобатни янада кескинлаштириши мумкин.

Шу билан бирга, Anthropic компанияси Оқ уй мазкур масала бўйича уларга расмий мурожаат қилмаганини маълум қилди. Компания чекловлар қандай тартибда ва қайси давлатларга нисбатан қўлланилаётгани ҳақида батафсил маълумот бермаган.

Сўнгги йилларда сунъий интеллект технологиялари атрофидаги геосиёсий рақобат кучайиб бормоқда. АҚШ ҳукумати илғор чиплар, суперкомпьютерлар ва сунъий интеллект тизимларининг экспорт қилинишига оид қатор чекловларни жорий этган. Энди эса мазкур рақобат тўғридан-тўғри сунъий интеллект моделларининг ўзига ҳам кўчаётгани кузатилмоқда.