Андижон вилояти Булоқбоши туманида атмосфера ҳавосини ифлослантираётган «Ч.Т.» корхонаси фаолияти 10 кун муддатга вақтинча тўхтатилди. Туман аҳолиси томонидан корхонанинг атроф-муҳитга зарар етказаётгани юзасидан мурожаат келиб тушган. Мурожаат асосида Экология қўмитаси, Андижон вилояти Экология бошқармаси ҳамда Экополиция ходимлари томонидан корхонада экологик назорат тадбири ўтказилган. Бу бўйича аҳоли вилоят хокимига 3 йилдан буён хабар беради, жавоб йўқ эди. Булоқбошилик талабалар халқаро ташкилотларга мурожаат қилгандан кейин ҳолат ўрганилгани айтилмоқда.

Текширув давомида корхонада атмосфера ҳавосини муҳофаза қилиш бўйича зарур чора-тадбирлар ишлаб чиқилмагани ва тошни қайта ишлаш жараёнида чанг-газ тозалаш ускуналари мавжуд эмаслиги аниқланган. Лаборатория таҳлиллари натижасида атмосфера ҳавосига меъёрдан ортиқ миқдорда зарарли моддалар чиқарилаётгани маълум бўлган.

Шунингдек, ишлаб чиқаришдан ҳосил бўлган чиқиндилар корхона ҳудудида тартибсиз жойлаштирилгани ҳамда корхона тегишли давлат экологик экспертизасининг ижобий хулосасини олмасдан фаолият юритаётгани аниқланган.

Аниқланган қоидабузарликларни бартараф этиш мақсадида корхона фаолияти 10 кун муддатга тўхтатилган. Корхонага чиқиндиларни белгиланган тартибда сақлаш ва олиб чиқиш, аниқланган камчиликларни бартараф этиш ҳамда экологик экспертизанинг ижобий хулосасини олиш бўйича кўрсатмалар берилган. Бундан ташқари, атроф-муҳитга етказилган зарар учун қўшимча компенсация тўловини ундириш белгиланган.

Аҳоли вакиллари яна шу аҳвол такрорланишиданишидан ҳавотирда. Элтузар мавзуга яна қайтади.