Андижонда подстанция навбатчи электромонтёри фуқаронинг 680 минг сўмлик электр қарзини 34 миллион сўм деб кўрсатиб, уни “ўчириш” учун 17 миллион сўм сўраган. У пулни олаётган вақтда ҳуқуқни муҳофаза қилувчи орган ходимлари томонидан ашёвий далиллар билан ушланган.

Маълум бўлишича, Қўрғонтепа туманидаги “Сўфи қишлоқ” подстанцияси навбатчи электромонтёри Ф.Х. Жалақудуқ тумани “Намуна” МФЙда яшовчи фуқаро Ф.Д.га нисбатан ўзига хос “энергетик арифметика” қўллаган. 680 минг сўмлик қарз қоғозда 34 миллион сўмгача ўсган. Бу ўсиш суръати ҳатто электр ҳисоблагични ҳам ўйлантириб қўяди.

Электромонтёр, тергов маълумотларига кўра, фуқарога 17 миллион сўм берса, ушбу “улкан” қарзни йўқ қилиб беришини ваъда қилган. Яъни қарз аввал 50 баравар катталаштирилган, кейин эса ярим нархига “акция” таклиф қилинган. Бозор тили билан айтганда, бу хизматда чегирма бор, лекин қонун тилида бунга фирибгарлик дейилиши мумкин.

Тезкор тадбир Бош прокуратура ҳузуридаги Департаментнинг Андижон вилояти бошқармаси ва бошқа ҳуқуқни муҳофаза қилувчи органлар ходимлари ҳамкорлигида ўтказилган. Гумонланувчи 17 миллион сўмни олаётган пайтда ушланган.

Ҳолат юзасидан Жиноят кодексининг 168-моддаси, яъни фирибгарлик бўйича жиноят иши қўзғатилган. Тергов ҳаракатлари давом этмоқда.

Хўш, 680 минг сўм қандай қилиб 34 миллионга айланди? Агар бу формула расман тасдиқланса, уни иқтисодиёт дарсликларига эмас, эҳтимол, жиноят иши материалларига киритишга тўғри келади.