Андижон вилояти, Андижон тумани, Завроқ МФЙдан ўтган йўлнинг аҳволини бир кўринг. Бу ўйдим-чуқур йўл кечаси ёритилмайди. Ҳолатни бошқа ҳудудлвардаги йўлларга нисбатан бир нави яхшироқ дейишимиз мумкин. Лекин тобора емирилиб бораётган асфалтнинг ҳоли бир йилдан сўнг янаям ёмонлашади.

Маҳалла аҳли 2023 йилдан буён бир неча бор тегишли ташкилотларга, жумладан, электрон порталга 5–10 марта мурожаат қилиб йўлни таъмирлашни сўраган. Бироқ, мурожаатлар ҳозирга қадар амалий натижа бермади. Андижон тумани автомобиль йўллари соҳаси масъулларига, Андижон тумани ҳокимига ҳам мурожаат йўлланган. Мурожаатларда Соғлом авлод кўчасини асфальтлаш, йўлни тартибга келтириш ҳамда тунги ёритиш чироқларини ўрнатишда амалий ёрдам сўралган. Натижа йўқ.

Хонадонларни ўрганиш, ёлғондан бандлик статистикани кўтариш билан банд бўлган раҳбарлар шу маблағ, вақт ва кучни йўлсозлик назоратига сарфласа фаровонлик учун дангал ва аниқ ҳаракат бўлар эди.

Мустақиллика эришганимизга 35 йил тўлди. Ҳар бир вилоят йўл-кўчаларини капитал таъмирлаш, жаҳон стандарти бўйича қайта қуришга 5 йилдан вақт сарфланганда ҳам бугун 7 та вилоятнинг йўллари Германия автобанларидек текис бўларди. Ўша машҳур автобанлар ўтган асрнинг 30-40-йилларида қурилган.

Лекин бундай ташаббус Ўзбекистон учун «не выгодно», йўллар ўта мустаҳкам бўлса уларни ҳар йили бир баҳона билан таъмирлашга, шу важ билан бюджет пулини ўзлаштиришга имкон қолмайди.