Ун заводи орқали қарийб 100 кишини иш билан таъминлаган тадбиркор Шерзод Халилов бир миллиард сўм қарз олиб, икки миллиардга яқин маблағ қайтарганидан кейин ҳам ундан яна пул талаб қилинганини билдирмоқда. Элтузарга йўлланган мурожаатда Ғолиб Раупович Эргашев ва адвокат Завқиддин Аминович Амоновнинг ҳаракатларини текшириш сўралган.

Мурожаатдаги даъвога кўра, тадбиркордан талаб қилинган сумма 4 миллиард 345 миллион сўмга етган, кейин эса 2,5 миллиард сўмга туширилган. Муаллифлар пул ундиришда аввал ёзилган тилхатлардан фойдаланилгани ва тадбиркорга босим ўтказилганини иддао қилмоқда.

Мурожаатда баён этилишича, Халилов заводни кенгайтириш ва қўшимча иш ўринлари яратиш учун фойдасини янги бинолар қурилишига сарфлаган. Айланма маблағи камайгач, аввал унга ёрдам таклиф қилиб юрган Эргашевдан қарз сўраган.

Муаллифларнинг айтишича, Эргашев бир миллиард сўмни олти ой ичида икки миллиард қилиб қайтариш шарти билан берган ва тадбиркордан икки миллиард сўмлик тилхат олган.

Кейинги тўловлар пайтида ҳам янги тилхатлар ёздирилгани, аввалгилари эса йўқ қилинган деб айтилгани даъво қилинмоқда. Мурожаатга кўра, Халилов икки миллиардга яқин маблағ қайтарган, аммо шундан кейин ҳам ўша тилхатлар асосида ундан пул талаб қилиш давом этган.

Муаллифлар бу жараёнга адвокат Завқиддин Амонов ҳам қўшилганини билдирмоқда. Уларнинг иддаосича, адвокат тадбиркорнинг оғир молиявий аҳволини, талаб қилинаётган пулни бериш учун ҳатто кредит олаётганини билган ҳолда маблағ ундиришга ҳаракат қилган.

Мурожаатда Амоновнинг мазкур ишдаги ваколатига ҳам савол қўйилган. Бироқ адвокатнинг ордери, қарз ва тўлов ҳужжатлари ҳамда тилхатларнинг тўлиқ мазмуни тақдим этилган матнда келтирилмаган. Муаллифлар суҳбат ёзувига ишора қилган, аммо унинг мазмуни ушбу матн асосида текширилган эмас.

Мурожаат муаллифлари Президент, Олий суд, ДХХ, Бош прокуратура, Ички ишлар ва Адлия вазирликлари ҳамда Адвокатлар палатасидан қуйидагиларни сўрамоқда:

Эргашевнинг пул ундириш билан боғлиқ ҳаракатларини текшириш ва ҳуқуқий баҳо бериш;

Фоиз эвазига берилган маблағлардан олинган даромад бўйича солиқ мажбуриятлари бажарилганини аниқлаш;

Адвокат Амоновнинг ҳаракатлари қонунийлиги ва касб қоидаларига мувофиқлигини ўрганиш;

Босим остида ёздирилгани айтилаётган тилхатлар юзасидан текширув ўтказиш;

Тадбиркорнинг ҳуқуқлари ҳимоя қилиниши ва адолат тикланишига кўмаклашиш.

Мурожаатдаги товламачилик, босим ва қарз тўланганидан кейин қайта пул талаб қилингани ҳақидаги айбловлар мустақил тасдиқланган эмас. Тақдим этилган материалда Эргашев ва Амоновнинг муносабати мавжуд эмас.

(Давоми бор…)