Ўзбекистонда катта бизнеслар миллионлар, миллиардлар билан ўлчанади. Аммо Бўка туман судига етиб келган бир жиноят ишида гап атиги 100 минг сўм ҳақида кетган.

Суд ҳужжатларига кўра, И. Еделькин 2026 йил 22 апрель куни соат 23:30 атрофида Пискент туманидаги яшаш уйида икки шахснинг жинсий алоқа қилиши учун шароит яратиб берган ва бунинг эвазига 100 минг сўм олган, деб айбланган.

Яъни, айблов версиясига ишонсак, инфляция ҳамма нарсани қимматлаштирган бир пайтда мазкур «хизмат» бозор иқтисодиёти қоидаларига унчалик мос келмайдиган тарифда ишлаган.

Бироқ ишнинг суддаги финали кутилмаган тус олди.

Суд муҳокамаси пайтида И. Еделькин 2026 йил 3 август куни вафот этгани аниқланган. Расмий қайдларга кўра, у ёлғиз яшаган, қариндошлари бўлмаган. Адвокат суддан айбланувчининг вафоти сабаб жиноят ишини тугатишни сўраган.

Қонун бу ерда ҳазилни кўтармайди: Жиноят-процессуал кодексига мувофиқ, айбланувчи вафот этган тақдирда, унинг айбдорлиги масаласи ҳал қилинмасдан иш тугатилиши мумкин.

Шундай ҳам бўлди.

Бўка туман суди И. Еделькинга нисбатан ЖКнинг 131-моддаси 2-қисми бўйича юритилган ишни унинг айбдор ёки айбсиз эканига ҳуқуқий баҳо бермасдан тугатди.

Шу тариқа, 100 минг сўмлик эпизод терговдан ўтди, прокурор қатнашди, адвокат қатнашди, иш суд столигача етиб келди.

Фақат ҳукм чиқаришга келганда айбланувчининг нариги дунёга равона бўлиб жазодан қутулиб қолгани маълум бўлди.

Ўзбекистон суд амалиётида баъзан миллиардлар йўқолиб кетади, баъзан эса 100 минг сўм ҳам жиноят иши бўлиб уч саҳифалик суд ҳужжатига айланади.

Бу ишда эса якуний нуқтани суд эмас, ҳаётнинг ўзи қўйди.